Somayajulu Musunuri: February 2013

Thursday 28 February 2013

పచ్చని ప్రకృతి... వందేళ్ల జీవితం

ఆరు తరాలను చూసిన బామ్మ
మనచుట్టూ పచ్చదనముంటే మనమూ కలకాలం పచ్చగా ఉంటాం. తమిళనాడులోని ఊటీకి దగ్గరున్న కుగ్రామం పుడుముండులో రుజ్జం అనే అవ్వ ఇలాగే ఆరుతరాలను చూసిందిట. ఇంత వయస్సొచ్చినా రుజ్జం ఎప్పుడూ చలాకీగా ముని ముని ముని మనవళ్లతో ఆడుకుంటూ ఉంటుంది. ఈ బామ్మలకే బామ్మకి 110 ఏళ్లు నిండాయని లెక్క. తోడా అనే ఓ గిరిజన తెగకు చెందిన ఈ కుటుంబం ఆరోగ్యంగా ఉండడంలో రహస్యమేంటో తెలుసా... ప్రకృతిని ప్రేమించడం. ఆరు తరాల్లో 230 మంది సభ్యులున్న ఈ మహా కుటుంబంలో రుజ్జం దగ్గర నుంచి నిన్నామొన్నటి పసిగుడ్డు దాకా అందరి ఆహార అలవాట్లు మంచివి.

సెల్ ఫోన్ లో మాట్లాడుతున్న 110 ఏళ్ల రుజ్జం

బామ్మ మాట... బంగారు బాట

కృత్రిమ ఆహార పదార్ధాల జోలికి వెళ్లకపోవడం
చిప్స్, ఛాట్లు, నూడిల్స్ ఇలాంటివేవీ తినకపోవడం.
రాగుల జావ, సజ్జ సంగటి, జొన్న అంబలి, పల్చటి మజ్జిగ ప్రధాన ఆహారమం
వెన్న, తేనె, నెయ్యి విరివిగా వినియోగించడం
తాజా పండ్లు, కూరగాయలే ఆహారం
పల్లె పెరట్లో దొరికే ప్రతి ఆకు కూరా అమృతమే
ప్రకృతిని ప్రేమించడం, మూగజీవాలను చేరదీయడం
సదాలోచనలతో పొద్దుపుచ్చడం
తోటి వారికి తోడూనీడగా ఉండడం
పొలం పనులతో సహా అన్నీ సొంతగానే చేసేసుకోవడం

ఇవీ రుజ్జుం ఆరోగ్యకరమైన సుదీర్గ జీవనానికి ఉపయోగపడుతున్న అలవాట్లు. ఆచరించేందుకు మనకూ మార్గాలున్నాయి. ప్రకృతిని మనం భక్షించకుండా ఉంటే అది మనల్ని రక్షిస్తుంది.

ఆంధ్రప్రదేశ్ లో 'చీకటి' రాజ్యం!

పల్లె నుంచి పట్నం దాకా పవర్ 'కట్'కట

ఈ చీకటి విడిపోదేమి...

@ ఆంధ్రప్రదేశ్ లో పవర్ కట్ సీజన్ మొదలు

@ హైదరాబాద్, తిరుపతి, విశాఖపట్నం, వరంగల్ రోజూ 2 గంటలు

@ అన్ని జిల్లా కేంద్రాలు, కార్పొరేషన్లలో రోజూ 4 గంటలు

@ పట్టణాలు, మున్సిపాలిటీల్లో రోజు 6 గంటలు

@ మండల కేంద్రాల్లో రోజు 8 గంటలు

@ గ్రామాల్లో రాత్రి 6 దాటాకే విద్యుత్ సరఫరా

@ పల్లెల్లో తెల్లవారాక 6 దాటితే పవర్ కట్

@ వ్యవసాయానికి భారీగా కోతలు

2016లో టైటానిక్ 2

థ్రిల్లింగ్ జర్నీకి అడ్వాన్స్ బుక్కింగ్స్

పసిఫిక్ మహా సముద్రంలో సరిగ్గా నూటా ఒక్కేళ్ల క్రితం మునిగి పోయింది ప్రపంచంలోనే అతిపెద్దదైన ఓడ టైటానిక్. విలాసానికి ఇది అసలుసిసలు చిరునామా. బ్రిటన్లోని సౌంతాప్టన్ తీరం నుంచి అమెరికాలోని న్యూయార్క్ కు బయలుదేరిన టైటానిక్ అర్దరాత్రి వేళ సముద్ర జలాల్లోని ఓ భారీ మంచు శకలం ఢీకొని మునిగిపోయింది. టైటానిక్ సినిమా చూశాక గానీ దాని గురించి మనకు పెద్దగా తెలియలేదు. అయితే ఆ సినిమా చూశాక టైటానిక్ లాంటి మహాద్భుత ఓడలో విహరించాలని చాలా మందే అనుకుని ఉంటారు. అలాంటి వారి కోసమే టైటానిక్ 2 షిప్ రెడీ అవుతోంది.

టైటానిక్ నమూనా నా సొంతం...!

ఆస్ట్రేలియాకు చెందిన బిలియనీర్ క్లైవ్ పామర్ ఈ బృహత్తర కార్యక్రమాన్ని చేపట్టాడు. 2016 లో ఇది సిద్ధమవుతుంది. యూరప్ ఇంజనీర్లు డిజైనింగ్ చేస్తే చైనాలో ప్రభుత్వ షిప్పింగ్ కంపెనీ దీన్ని తయారు చేస్తోంది. ఎంత ఖర్చవుతుందన్నది తెలియదు గానీ ఇందులో ప్రయాణించడానికి అప్పుడే బుకింగ్స్ మొదలయ్యాయిట. ఇప్పటికే 40 వేల మంది టిక్కెట్లు కొనేసుకున్నారు. ప్రమాదానికి గురైన నాడు ఒరిజినల్ టైటానిక్ ప్రయాణించిన సౌంతాప్టన్ నుంచి న్యూయార్క్ వరకూ టైటానిక్ 2ను నడుపుతారట. టిక్కెట్ కు పది లక్షలు పెట్టి ఔత్సాహికులు అడ్వాన్స్ బుకింగ్ చేసుకుంటున్నారు. ఆనాటి ట్రాజడీని గుర్తుచేసకుంటూ సరికొత్త థ్రిల్లింగ్ అనుభవించాలనుకునే వారు క్లైవ్ పామర్ అడ్రస్ కనుక్కోండి.

తానా గ్లోబల్ సైన్స్ ఫెయిర్

విద్యార్థుల్లో విజ్ఞాన శోధన

ప్రపంచ వ్యాప్తంగా ఉన్న తెలుగు విద్యార్థుల్లో సృజనాత్మకతను వెలికితీసేందుకు తానా చేపట్టిన గ్లోబల్ సైన్స్ ఫెయిరుకు విశేష స్పందన వచ్చింది. ఆస్ర్టేలియా, అమెరికా, కెనడా, కువైట్, బెహ్రయిన్, శ్రీలంకల్లో నివాసం ఉంటున్న తెలుగు విద్యార్థులు తమ ప్రతిభాసక్తులను ఇందులో ప్రదర్శిస్తున్నారు. సైన్స్ పట్ల తమకున్న ఆసక్తిని, ప్రయోగశీలతను ప్రదర్శించడానికి ఇది అంతర్జాతీయ వేదికగా తోడ్పడుతోందంటున్నారు కార్యక్రమ చైర్మన్ వి. రాజేష్, తానా అధ్యక్షుడు తోటకూర ప్రసాద్.

వివిధ దేశాల్లో మొదటి దశలో వెయ్యి ప్రాజెక్టులు... వీటిలోంచి రెండో దశలో 180 ప్రాజెక్టులు ఎంపిక చేశారు. 11 సైన్స్ విభాగాల్లో 6 నుంచి 8 క్లాసుల విద్యార్థులు జూనియర్లుగా, 9 నుంచి 12 క్లాసుల వాళ్లు సీనియర్లుగా పోటీ నిర్వహిస్తున్నారు. సెమీ ఫైనల్స్లో ఎంపిక చేసిన ప్రాజెక్టులను మార్చి 31న ప్రకటించనున్నారు. అలాగే మే 24 నుంచి 26 వరకూ డాలన్లో జరిగే తానా సభల్లో ఫైనల్స్ పోటీలుంటాయి. ఈ గ్లోబల్ సైన్స్ ఫెయిర్కు తానాతో పాటు ఈనాడు, ఈటీవీ భాగస్వామిగా వ్యవహరిస్తోంది.

పైసా ఆనా... జానా !

సామాన్యుడి సణుగుడు

పట్టుమని జత బట్టలైనా పట్టని ఓ చిన్న సూట్ కేసులో సుమారు 16 లక్షల కోట్ల ఖర్చుకు లెక్కలేసిన కాగితాలు మోసుకొచ్చారు చిదంబరం. ఆ అంకెల గారడీ సమాన్యుడికేమీ అర్ధం కాదు గానీ, ఏ వస్తువు ధర పెరుగుతుంది... ఏది తగ్గుతుందనేది ముఖ్యం. 'ప్రపంచాన్ని కుదిపేస్తున్న ఆర్ధిక మందగమనం నుంచి బయట పడాలంటే 'సంస్కరణ'ల బాటపట్టక తప్పదు. అలాగని 'సంక్షేమం' పట్టదనుకోలేం. ద్రవ్యోల్బణం అదుపు చేస్తూ... ద్రవ్యలోటును అధిగమిస్తూ... సర్కారు ఖర్చును తగ్గిస్తూ... ఎలాగోలా ఖాళీ అయిన ఖజానాను నింపేందుకు 'పరోక్ష పన్నుల' మార్గాన్నెంచుకున్నారు ఆర్ధిక మంత్రి చిదంబరం.

ఏ ఏ రంగాలపై చల్లని చూపు

మహిళా సంక్షేమానికి వెయ్యికోట్లతో 'నిర్భయ' నిధి
మహిళల కోసం త్వరలో వెయ్యికోట్లతో ప్రత్యేక బ్యాంకు
యువతకు నైపుణ్య శిక్షణ కేంద్రాలు, ఉపాధి అవకాశాల పెంపు
పిల్లల్లో పౌష్టికాహార లోపం నివారణకు పథకం
ఎస్సీ, ఎస్టీ, మైనారిటీ సబ్ ప్లాన్లకు దండిగా నిధులు
ఎల్ఐసీ విస్తరణ, పోస్టాఫీసుల్లో బ్యాంకింగ్ సేవలు
చేనేత కార్మికులకు తక్కువ వడ్డీ రుణాలు
టీచర్లు, అంగన్వాడీ వర్కర్లు, ఎస్ హెచ్ జీ సభ్యులకు గ్రూప్ ఇన్య్సూరెన్స్

వేతన జీవుల మాటేంటి...

ఉద్యోగుల ఆదాయంపై పన్ను రాయితీ లిమిట్ రూ. 2.20లక్షలు
మిగతా స్లాబులు యధాతథం
ఐదులక్షలలోపు ఆదాయం ఉంటే రూ. 2 వేల పన్ను రాయితీ
గృహరుణంపై వడ్డీకి పన్ను మినహాయింపు రూ. 2.50లక్షలు

పెరిగేవి...

వెండి నగలు, వస్తువులు
సిగరెట్లు, టొబాకో ప్రొడక్ట్స్
రూ.2 వేలు దాటిన మోబైల్ ఫోన్లు
800 సీసీ మోటార్ బైకులు
విలాసవంతమైన కార్లు
డీటీహెచ్, సెట్ టాప్ బాక్సులు
ఏసీ బార్లలో సర్వీసులు
మార్బుల్ పలకలు

తగ్గేవి...

చేనేత, నూలు వస్త్రాలు
రెడీమేడ్ దుస్తులు
చేనేత తివాచీలు
లెదర్ వస్తువులు... చెప్పులు, బెల్టులు, బ్యాగులు

Wednesday 27 February 2013

బడ్జెట్ బాతాఖానీ

చిదంబరం పెట్టెలో ఏముంది?

బడ్జెట్ అంటే రానున్న 365 రోజుల్లో మనం ఏమేమి ఖర్చులు పెట్టబోతున్నాం, దేనికెంత వెచ్చించాలన్న లెక్కాపద్దూ. చిదంబరం కసరత్తంతా పూర్తి చేసి కాగితాలు పెట్టెలో సర్దేసుకున్నారు. 28న లోక్ సభలో తెరుస్తారు. అయితే అందులో ఏముంటుందనేదే ఆసక్తి. 130 కోట్ల భారతీయులందరి తలరాత రాసేది చిదంబరం. కానీ ఆయన లెక్కాపద్దుల పుస్తకం గురించి ఆలోచించే తీరిక సగటు పౌరుడికి లేకుండాపోయింది.

ఎన్న సారువాడూ... ఏమిదా తెస్తివి?

ఆర్ధిక సర్వే ఏం చెప్తోంది?

బడ్జెట్ సమర్పించడానికి ముందురోజు ఆర్ధిక సర్వే పార్లమెంటు ముందు పెట్టారు. ఆర్ధిక రంగం మందగమనం చాలించి పురోగమనం దిశగా సాగుతోందిట. ఇక వేగవంతమవడం ఖాయమంటారు మన మంత్రిగారు. సామాన్యుడి బతుకులు చూస్తుంటే ఇందులో ఏ మాత్రం నిజం లేదనిపిస్తుంది. సబ్సిడీలకు స్వస్తిపలకండి, పన్నుల మోత మోగించి ద్రవ్యలోటును పూడ్చుకోండి, సంస్కరణల పేరుతో ఆర్ధిక పొదుపు పాటించండి, ఖజానా ఖాలీచేస్తున్న సర్కారీ ఖర్చులు తగ్గించుకోండి... ఇలా సాగిపోయింది సర్వే లెక్క.

2014 ఎన్నికలే టార్గెట్...సంక్షేమమనే బ్రాండ్

యూపీఏ 2 సర్కారు యూపీఏ 3గానూ కొనసాగాలంటే 2014 ఎన్నికల్లో పెద్ద గండమే గట్టెక్కాలి. డీజిల్ ధరల బాదుడు, ఎల్పీజీ సిలిండర్లపై పరిమితులు, నిత్యావసరాల రేట్లు మండిపోవడం, మహిళలపై హింసాకాండ... ఇలా సామాజిక, ఆర్ధిక సమస్యల చిట్టా చాలా పెద్దది. వీటన్నిటినీ అధిగమించి ఓటర్లను సమ్మోహన పరిచే అస్త్రం మన్మోహన్ సింగ్ దగ్గరైతే లేదు. అంతా టెన్ జన్ పథ్ నుంచి మేడమ్ ఆడించే గారడీయే. ఆహారం, ఎరువుల సబ్సిడీల్లో కోత పెట్టాలనేది ఆలోచన. గరీబుకు, రైతన్నకు ఇది దెబ్బే. రైల్వేకి బడ్జెటరీ సాయాన్ని బాగా తగ్గించేశారు. రక్షణ శాఖకు అరకొరగా విదులుస్తారు. అన్నీ ఉండి పాకిస్థాన్, చైనా లాంటి దేశాలకు భయపడాల్సిన పిరికితనం. ఇక రక్షణ శాఖ ఖజానా డొల్లగా మారితే దేశ సార్వభౌమత్వం ఏమిగాను? సంక్షేమమనే బ్రాండ్ వేసినా ఆచుతూచి ఖర్చుపెట్టుకోవాలని ప్రణాళిక సంఘం ముందునుంచే నూరిపోస్తోంది.

ప్రభుత్వ రంగానికి విఘాతమే...

ప్రభుత్వ రంగ పరిశ్రమల్లో పెట్టుబడులను ఉపసంహరించేసి చకచకా ప్రైవేట్ వ్యక్తులకు ధారాదత్తం చేసే పని ఊపందుకుంటోంది. 40 వేల కోట్ల రూపాయల సర్కారు షేర్లను అమ్మేయాలన్నది లక్ష్యం. ఇలా ఒక్కోటీ ప్రయివేటీకరించేశాక సర్కారు వ్యవస్థ కేవలం సేవారంగానికే పరిమితమవుతుంది. కీలకమైన ఉత్పాదక, నిర్మాణ రంగాల నుంచి చేతులుదులుపుకుంటుంది.

టాక్స్ నెట్ చాలా పెద్దది!

పన్నులు పెంచడం లేదంటూనే పరోక్షంగా ముక్కు పిండి వసూలు చేసే టెక్నిక్కులు ఇటలీమాత దగ్గర పుష్కలంగా ఉన్నాయి. మరింత మందిని పన్ను పరిధిలోకి లాగేసేయండని ఆర్ధిక సర్వే కూడా పురిగొల్పింది.

బడ్జెట్ లైన్స్...

డీజిల్, ఎల్పీజీల రేట్లు పెంచాలనుకుంటున్నారు.
సిమెంట్ మీద సుంకం పెంచితే ఇళ్లు కట్టి చూడటం కష్టసాధ్యమే.
బంగారు నగల మీద పన్ను మోత తప్పేట్లు లేదు.
చిన్న కార్లమీద జీవిత పన్ను 12 శాతం నుంచి 10 శాతానికి తగ్గించాలంటోంది ఆటోమోబైల్ రంగం
డీజిల్ వాహనాలు, రవాణా వాహనాల మీద సుంకం పెంచే ఛాన్స్
లెవీ, టాక్స్ భారం తగ్గించాలంటూ టెలికాం రంగం ఒత్తిళ్లు
పన్ను రాయితీలడుగుతున్న ఐటీ సెక్టర్
ప్రోత్సాహకాలు కోరుతున్న గృహ నిర్మాణ రంగం
రిటైల్ రంగం నుంచి పన్ను మినహాయింపు ఒత్తిళ్లు